上屆冠軍練馬師大摩，今季暫時成績平平，只於上周末憑「和諧氣氛」開齋贏得一win咁大把，但無損其心情，更在屯門黃金海岸舉行燒烤派對，邀請員工及馬主，慶祝上季奪得冠軍寶座。
大摩向來予人形象較嚴肅，但當晚燒烤會上展示活潑好動的一面，同未婚妻梅姐(Fifi)、「新力風」馬主黃良柏、郭能伉儷及馬房手足玩到好盡興。
場內有人負責打碟，全晚有輕快音樂襯托，大摩甚至落手落腳切生果，準備沙律，更當眾親吻Fifi，氣氛高漲。燒烤會還準備了印有JGM（大摩英文名簡寫）的手提小風扇，派發給在場人士，非常體貼。
除了燒烤場內食物外，Fifi還親自從街市選購了新鮮花甲及大鱔，供各人燒烤。大摩表示想過在五星級酒店設宴，但Fifi建議搞燒烤會氣氛更輕鬆，玩得更放。大摩話看到一班馬房手足帶埋家人冇壓力心情愉快個樣，證明決定是正確。而某位員工帶咗隻寵物鸚鵡到場，引起大摩、郭能等人嘅興趣，紛紛加入玩雀行列，大摩更一邊玩雀一邊隨拍子跳舞，開心到不得了。
講番跑馬，連埋本周三晚，大摩今季谷戰仍冇馬參賽，佢氣定神閒地表示There's no hurry(不用着急)，大摩解釋旗下馬上季拼搏太多，部份需要休息，但十月會陸續增加報名馬全力搏殺。至於下周一(28日)沙田日賽，大摩嘅「田黃」上季第二次上陣，即喺泥地大勝，擺明大超班，日前參加大閘，留前試後點到即止，已經操好，屆時出戰擅長的泥地1200米，絕對係機會分子，又難怪大摩對自己成績毫不擔心。