警方前排刪改警務處有關六七暴動歷史嘅網頁內容，好多人都鬧爆此舉係竄改歷史，包括民主黨主席劉慧卿個姪。
卿姐呢位姪仔劉成漢，係描述警隊六七暴動歷史《皇家香港警察的最後一夜》電影嘅導演，佢喺卿姐網台節目入面表示，警方刪改歷史係「欲蓋彌彰、搞大咗」，唔信係左派或北京指示，似係警方「自動獻身」多啲。佢大鬧將共產黨民兵改為內地槍手係「可笑、極之誤導」，反問若果只係槍手，到底呢啲槍手係劫匪、黑社會殺手定係獨行變態殺手？劉導演同意刪減嘅部份，則係話被稱為「紅色肥貓」、支持動亂富商送仔女去英美讀書一段，事關呢段似八卦新聞多啲。