黃竹角嘴「鬼手岩」係中國香港世界地質公園重點標記之一，而且仲係𠵱家通用郵票$2.2上取景嘅地方。網名Li Na Ngan嘅影友黃小姐上周末去影相，發現隻手好似唔同咗，返屋企後搵相一對，弊，左二「手指關節位」崩咗一塊，出現一個凹位，「我真的想哭！」
漁護署地質公園網頁介紹，黃竹角嘴擁有香港最古老岩石，4億年前形成，因地殼褶曲及風化同侵蝕，雕琢出呢隻鬼手岩。黃小姐話個崩位可能係風化及侵蝕造成，但佢亦都話不時有人喺網上po相，見到唔少遊人爬上隻手影相，「嗰個崩位好大機會啲人借力爬上去影相」所致。
專家估係自然風化
有網民留言話，早前去睇時見到有人爬上去影相，即刻喝止佢哋。地貌岩石保育協會主席吳振揚睇過啲相，佢話人為破壞嘅話，會較明顯，相信自然風化及侵蝕造成崩損較大，佢唔贊成以人工保育，但都認為應避免遊人造成破壞，促請漁護署加強巡邏、處罰及宣傳，「騎、爬上去一定要罰」。
鬼手岩好似拳頭握住，潮漲時只露出手指，潮退先至見到手腕。黃竹角嘴都唔易去，由烏蛟騰行入去要4、5個鐘，入面有個黃竹角墩臺，資料話建於清康熙7年，即1668年。
李八方
mailto:[email protected]