這天沙田晨課是多達13組試閘，有極多高班明星馬參與，當中洪金寶愛駒「崇山寶」由潘頓試第一組1000米草閘，結果這匹直路王發揮一貫驚人速度，由頭放到尾，造出約56秒6極佳時間彈甩對手勝出，雖然「崇山寶」久休缺陣多時，但今課所見明顯回復生氣，表現遠勝八月底試嘉年華閘之時。強如「兵威振」、「新力風」今課都無法給予威脅，只得二三名。
累積7捷的「崇山寶」將會跑10月1日1000米直路賽國慶盃三級賽，今朝試閘其實台前幕後都好緊張，除了出試前後練馬師姚本輝都傍到實外，馬主洪金寶亦有到場，喺看台觀看愛駒嘅走勢，大哥大話「崇山寶」嘅健康良好，狀態亦出色，6歲馬戰鬥力仍喺高峰期，而姚本輝亦話好滿意隻馬今朝試閘嘅表現，已有爭勝水準，會全力爭奪國慶盃，但就已打消遠征11月7日澳洲費明頓馬場1200米直路一級賽維多利亞賽馬會錦標的念頭。
至於潘頓，佢話好早以前曾經用心操過「崇山寶」一段時間，但始終冇機會夥拍此駒上陣，非常可惜，如今終於將替牠出戰國慶盃，感到既興奮又期待，有信心取得佳績。