行政會議逢周二開會，《蘋果日報》次次都會派同事到特首辦，聽吓特首梁振英（圖）開會前有乜偉論發表以及點回應記者提問。八方同事噚日照舊去等行會，再一如以往向CY提問，包括點睇陳佐洱嘅「去殖民化」言論及高鐵「爆煲」點算好？點知CY突然讚八方同事「好勤力」，笑指「差唔多每星期都係你先拔頭籌」，令現場唔少政府人員同記者都好意外；有政府中人私下笑指，CY平時好少「讚人」喎。
查實平日最多只有一兩份報紙會派記者採訪行會，據聞唔少傳媒都覺得，現時特首辦設計太封閉，行會成員出入都唔會俾傳媒見到，扑咪機會同舊政府總部開會時相比近乎零，覺得等嚟都無乜意思。八方都支持《蘋果》次次去等，無理由嘥咗為公眾關心議題發問嘅難得機會。