喺強國咩都可以有山寨，好似之前《魔雪奇緣》又可以變《魔鏡奇緣》，近日網上就流傳出一條預告同幾張相，係電影海報同trailer，叫《拜托了 小叮噹》，咦?難道係《多啦A夢》?
先睇相，可以睇到有個男仔扮大雄，年紀至少都有十幾歲，完全就唔係原著中嘅小學生，而呢位「大雄」頭上就有一隻真嘅貓仔，冇錯，呢隻貓仔就係哆啦A夢喇！係咪好神奇呢，由一隻頭圓圓、肥嘟嘟嘅機械貓，變咗做一隻可以放喺頭上嘅真貓仔，點解要咁做？當然佢可以話呢隻貓仔係機械貓啦…….
咁海報入面除咗貓同大雄之外，可以見到其他角色，著上唔同嘅衫，係似足靜香，胖虎佢哋喎...但係最奇怪嘅地方係有一個咸蛋超人出現，你冇睇錯，係咸蛋超人，佢著住一條有個「貨」字嘅圍裙，頭上仲有兩束白頭髮，做咩啫你？
而呢部戲嘅預告片，就用咗隻「真實化多啦A夢」出場，有啲恐佈片啲奸角出場咁，最後就好得意咁喺大雄個櫃桶出現，之後就完咗，所以劇情係點呢？o依家係冇人知嘅。
但《多啦A夢》日本方面特別注重版權問題，呢套戲個名就叫做「拜託了，小叮噹」，仲加多句「哆啦A夢真人版大電影」，用埋個名，大改原著嘅設定，唔知有冇問過日本方面呢？係真係攞咗版權先拍吖？定係只係一套山寨冇版權嘅作品呢？
其實呢張海報同預告一出，已經引起日本網民討論，所以如果真係冇攞版權的話，日本官方應該好快就會知呢件事。而條片嘅最尾，出品人就寫住「J‧MA」，由於條片傳出出處係由阿里巴巴嘅網站放出嚟，淘寶方面亦有賣呢部戲嘅廣告，而亞里巴巴老闆馬雲英文名係Jack Ma，所以連新華網都話呢部戲疑係由馬雲出品，到時佢係咪要出嚟講「淘寶冇假貨」?