郭富城近日同4歲多小女孩Peony合作拍微電影《愛在當下》，劇情交代兩父女踩單車台灣環島遊，令城城同Peony建立咗一份父女情。噚晚佢哋喺太古城現身微電影首映，城城全程肉緊湊女。
等緊真命天女
Peony在戲中向城城講咗一句叫爸爸唔好老，窩心又催淚，城城台上話：「我聽到呢句對白，當時個心好似停頓咗，我感受到佢好珍惜爸爸，拍完令我有啟發，當時間過去咗，冇辦法捉住，大家要諗吓點去表達一份真實嘅感覺，例如攬吓、錫吓愛錫嘅人。」城城爆料Peony拍攝期間因掛住真爸爸一度鬧情緒三個鐘，結果城城慈父上身陪佢摺飛機。司儀追問城城幾時做真爸爸？佢話：「希望有一日結婚成家，有自己嘅小朋友。」更話自己會係一個好爸爸，不過真命天女就要等上天安排。
城城喺電影《父子》有囝囝吳澋滔，𠵱家有埋囡囡Peony，問到會唔會勾起同亡父回憶，佢話：「父子關係唔同，囡囡錫一啖好似融化晒，將來都想生個女。」
撰文：馮仁昭