「長和主席」由於身體原因辭任公司主席兼執行董事，唔通有人俾官媒鬧得多，身體抱恙？且慢，此長和其實不同彼長和，講緊嘅，並唔係超人李嘉誠旗下嘅長和（001），而係長和國際（009）主席金磊唔撈啫。
一早講過，長實與和黃合併後，改名長和，好易令人將1號仔同9號仔混淆，今年初都有股民炒錯9號仔。
9號仔嘅大股東係有「東莞首富」之稱、廣東黃河集團董事長鄭強輝，呢隻股前身係黃百鳴揸旗嘅東方娛樂，東莞首富入股後，兩年前將佢改名做長和國際。
唔講唔知，9號仔有投資電影《大鬧天宮》，電影入面，飾演哪吒嘅鄭家星就係鄭強輝嘅公子。但鄭氏父子冇坐入9號仔董事會，主席金磊唔做，由執董許偉利頂上。