今時今日，要上位，一個字，難！facebook、YouTube大行其道，人人都可以做主角，盡情呃like呃share。不過就算facebook再多like，概念上同你揸住層升值嘅自住樓一樣，都係紙上富貴。要真正上位，唔能夠在現實世界入面有所得，真係講來都嘥氣。以下上位案例，歡迎參考。
1、樂視——燒銀紙
雖然樂視係中資背景，不過佢個facebook小編一向抽水快，加上本土味濃，因而成功令品牌快速上位。你唔好理佢係咪扮本土，總之佢成功令好多香港人，知道樂視會喺香港搞網絡電視。鋪路咁耐，昨日公佈獲香港未來三季英超獨家播映權，強調車路士唔會變「切爾西」，成個品牌image出晒嚟。上晒成功靠乜嘢？盛傳英超單刁就使咗佢47億元，簡單講，就係兩個字，靠錢。冇錢？點會搵到一代門神舒米高同你守龍守西瓜波呀？
2、FFx——嘟到盡頭
你問近期香港有乜新晉實力派歌手，冇人答到。不過你話有乜新晉上位組合，你可能會諗起MK Gal Pop女團FFx！憑化咗慘過冇化嘅妝容，郁咗衰過唔郁嘅舞步，加上900蚊成本嘅天價MV，成功登上C1頭條！你話嗰啲捱咗十幾廿年，連丁點知名度都冇嘅音樂人情何以堪呢？事件證明除非你好有實力，做到《羅生門》咁嘅質素，否則冇實力又要上位，就要將自我形象當成地底泥，盡情認真mode嘟到盡頭，為博全人類恥笑，咁你就得米了。
3、李小加——打關係
李小加俾《華爾街日報》質疑佢，任摩通中國區主席時，推薦官二代入摩通……嗱呢單嘢，我係要高度讚揚佢。港交所（388）最大重任係乜？就係搵錢。由一個懂得國情，運用交際手腕拉關係嘅人出任CEO，對港交所股東某程度上係好事嚟嘅。咁佢上任以來，打關係成唔成功？有冇於管理港交所時發揮所長？咁我就冇足夠資訊評論啦。
不過，好肯定嘅係，李小加人工唔「小加」，人工連花紅年年有得加，今年初年薪加4%至900萬元，6月時又獲續約3年，咁你話佢同董事局關係好唔好啦？
4、陳偉霆——SaSa滾
一個半紅不黑嘅男星，當年因為同阿Sa拍拖，終於由面目模糊嘅「而我不知道陳偉霆是誰？」，變成中國當紅小生。用保險agent tone講句：「人生不同階段，都應該有不同目標。」而陳偉霆好明顯正為事業更上一層樓做準確，學朋友Martin話齋，佢今日大喝一句：「SaSa，滾！」製造一單轟動娛圈嘅新聞後，以後就可以繼續sasa滾，輕鬆製緋聞了。
5、特首——自認超然
活在自己嘅世界，就算你話你係神，我都吹你唔脹嘅。
千頌C
http://fb.com/winbigwok
本欄隔周三刊出