中國互聯網BAT三巨頭阿里巴巴馬雲、百度李彥宏與騰訊（700）馬化騰跟咗國家主席習近平訪美，小米老闆雷軍無緣跟埋去，就坐鎮北京總部主持小米4c手機發佈會，佢都好識做宣傳，除咗介紹新產品，手上又戴住湖水藍嘅小米智能手帶（香港賣99蚊），夠晒搶眼。
其實老闆借用各種場合幫旗下產品做宣傳都好正常，好似太古A（019）主席史樂山每次主持記者會，都放支可口可樂喺枱面，珠寶店老闆娘每次現身亦都成身珠光寶氣，難得小米有戴得嘅產品，雷軍當然戴埋上身喇。講番呢場推介會，除介紹新機，雷軍仲宣佈成立電訊品牌「小米移動（Mi Mobile）」，跟聯通（762）與中電信（728）合作推出兩款電話卡，實行進軍埋電訊業。生意越做越大，將來應該可以跟埋習大大外訪了。