新任廣播處長梁家榮噚日首次喺港台廣播大廈，閉門同全台近200多名員工交流個半鐘。八方聽聞同前任台長鄧忍光唔同，員工反應冷淡，一開始時無乜人提問，榮總亦唔多答嘢，會議頭半粒鐘冇出過聲，有時仲叫仲有3個月就退休嘅副廣播處長戴健文代答。
除咗搵阿戴頂檔，榮總仲識「戴頭盔」，發表可能辣㷫員工嘅言論前，都事先講明純粹個人意見，再指自己係「發噏瘋」。據講榮總會上講得最多係叫員工「multitask（多功能）」、「拍膊頭」同埋「操多啲」，據知有港台員工聽到後唔多like，即場向榮總大呻，平時做節目之餘，仲要兼顧好多嘢，資源亦唔多夠，唔知榮總聽到呢班員工心聲之後，點樣先可以幫到手呢？