一講起保險公司代言人，華華第一時間會諗起姜大衛、許紹雄，最近經過銅鑼灣港鐵站，就一定見到周柏豪，今期連罕有搵明星做宣傳嘅友邦保險（1299）都搵郭富城拍微電影，唔通潮流興搵明星sell保險？
過去保險公司都鮮有搵明星做宣傳，通常簡單搵啲「大眾臉」，講吓點樣為子女部署教育基金、點樣做退休策劃，以至係財富傳承，今次友邦出動到「影帝級」嘅城城做宣傳，真係唔知下次仲可以搵邊個嘞。
講番呢套微電影，8分鐘嘅精華版大sell父女溫情，其實呢啲溫情橋段，來來去去差唔多，都有些少膩，好在有城城演技搭夠。更有睇頭，當然係飾演女兒嘅可愛小妹妹，佢眼仔睩睩，笑容十足，年紀輕輕，一樣交足戲，應該好快得到其他廣告商垂青！