時不時聽到身邊絲打們頭痕狂呻，話要化靚妝出席重要晚宴，奈何自己化妝工夫未夠耍家，花錢請化妝師代勞又要荷包大出血，惟有面懵懵到化妝專櫃扮試產品騙駐場化妝師替她們化幾化。此舉雖然成本最低，但閣下的面皮要有幾尺厚才可行。其實不想尷尷尬尬，兼且令sales姐姐和化妝師白做一場，識做的你其實可以選擇專櫃化妝服務，在場買滿指定金額全面彩妝即時免費，名正言順又化又拎，而且下次又可以再encore！
幫襯$500送化妝對比起數千元一次的化妝師收費已經夠抵，要好好用盡$500，記者精選四個至筍組合。
A餐（脫眉毛＋妝物x2＋化妝＝補$0）
幫襯脫毛服務其實最抵，再買兩支眼妝妝物，斗零也不用補！
B餐（脫眉毛唇毛＋護膚品＋化妝＝補$5）
最怕女生有「鬍子」，有化妝姐姐在前最好讓她代勞脫走「男人味」。
C餐（染眉毛＋妝物＋化妝＝補$25）
坊間染眉毛地方其實不多，美容專櫃更是極罕，補$25買多盒眉蠟、眉粉、眉刷和眉鉗，抵。
D餐（護膚品x2＋化妝＝補$115）
平日不多化妝的，可以選擇購買護膚品，聽我講，一定用得着。
若果閣下手頭較緊，對以上專櫃化妝服務仍有保留，也可選擇買支迷你版王牌化妝品，百多元有交易，全場最平。不會太尷尬得來，化妝姐姐又不會吃白果嘛！
記者：羅祖兒
攝影：林栢鈞