見到安東尼馬迪爾嘅表現，朗尼會有咩感想呢，唔知佢會唔會覺得羞愧呢？周日場英超，全靠馬迪爾梅開二度，加埋迪基亞尾段「神救」，曼聯作客以3:2險勝修咸頓，而隊長朗尼就全場魂遊，一次射門都冇，就連領隊雲高爾都頂佢唔順，要捉佢去訓話。
雲帥讚新亨利好有才華
繼上輪聯賽處子登場對利物浦射入一球，「新亨利」馬迪爾呢場又有貨交，佢把握到對手右閘吉田麻也兩次犯錯，冷靜射入兩球，係曼聯反敗為勝嘅重要功臣，佢賽後亦被選為今場嘅最佳球員。一、兩個星期間，輿論方向大轉，馬迪爾由一個價值3,600萬鎊（約港4.33億港元）的恐慌性收購，變成物有所值嘅筍貨！
雲高爾賽後盛讚馬迪爾，話佢其實仲未適應到新環境，「馬迪爾仲未識講英文，我要靠費蘭尼同舒尼達連，用法文同佢溝通。英文幾難學，但佢好肯去學，相信學識都係時間嘅問題。佢好有才華，踢三場射入三球，平均一場一球，非常好，但佢始終只係19歲，嚟緊狀態一定會有反覆。」
馬迪爾俾人讚到天上有地下無，但隊長朗尼就慘嘞，踢到隱形人咁，被網民圍插。朗尼今場復出，踢進攻中場，自由度大啲，真係啱晒佢踢，但佢冇入波都算嘞，連射門都冇，甚至成個上半場連一腳傳入禁區嘅傳球都冇，究竟佢係踢緊防中定攻中呢？比賽末段，鏡頭影到雲高爾叫咗朗尼去場邊訓話，雲帥黑晒面，一睇就知唔滿意朗尼嘅表現。香港網民仲好有創意，幫呢段片加埋字幕。好多網民都要求朗尼唔好霸住個正選，話板凳先係佢嘅最佳位置。
險勝3:2多得迪基亞神救
呢場波最終曼聯贏3:2，尾段修頓用高波轟炸曼聯禁區，真係差啲追平，好在門將迪基亞神救，包括撲出荷西方迪嘅頭槌，曼聯先至可以保住三分，排喺聯賽第二位。雖然雲高爾賽後又牙擦擦話要爭標，但我求大俠見到，曼聯今場條防線好似紙板人咁，頭槌輸晒，好心雲帥你鞭策吓條後防先好講爭冠軍啦！
