中超球隊山東魯能嘅母公司魯能集團禮拜日宣佈，請咗碧咸（圖）嚟做形象大使。碧咸亦喺微博度話：「我好期待遲啲嚟中國參觀魯能集團，大家一齊推廣社會發展同慈善活動。遲啲喺中國見啦！」內地網民好開心，個個都好期待碧咸再嚟中國宣傳。其實前年碧咸都做過中超嘅推廣大使，嚟過中國訪問五日，最令人難忘嘅係，佢着住皮鞋斬波嗰陣滑倒。