前幾日報道過皇家馬德里主席佩雷斯，邀請咗被匈牙利女記者絆倒而爆紅嘅敘利亞難民、莫森一家參觀巴拿比奴，仲邀請佢哋坐主席包廂睇上周六皇馬對CF格蘭納達嘅西甲比賽。喺比賽前，皇馬更加搵咗莫森嘅囝囝薩伊特同基斯坦奴朗拿度（C朗）手拖手出場，睇見薩伊特笑住咁望實C朗個樣，真係夠晒窩心！
不過，皇馬呢場波嘅表現就一啲都唔爭氣喇。佢地全場有20吓射門，但只係憑住賓施馬下半場嘅頭槌頂入，以1:0小勝對手，對上兩場大發神威嘅C朗就食白果，唔知薩伊特有冇少少失望呢？而皇馬門將基羅拿華斯已經保持五場不失球，繼續破開季不失球紀錄。
費托復蘇挫伊巴
至於皇馬嘅同市死敵馬德里體育會，作客就憑安祖哥利亞同費蘭度托利斯嘅入球，以2:0輕取伊巴。「王子」費托雖然呢場波只係做後備，但下半場入替依然有貨交，連續兩場聯賽有「士哥」。睇見費托慢慢搵番狀態，相信馬體會教練施蒙尼同球迷都會好滿意！