英超倫敦打吡上周六已經告一段落，主隊車路士憑葛特蘇馬同夏薩特入波，反底贏阿仙奴2:0，而完半場前搞到基比爾包列斯達被罰離場嘅「嗱喳哥」迪亞高哥斯達（DC）成為焦點人物。雖然「嗱喳哥」係車仔主帥摩連奴口中嘅最佳球員，但各方對佢嘅抨擊就冇停過喇。連阿仙奴名宿基昂都話想復出同DC抽番場㖭！
基昂嬲到想隻揪
其中，英格蘭傳奇射手舒利亞就講到：「DC先用誇張嘅反應嘗試令高基連拎黃牌，之後仲用雙手攻擊哥斯尼塊臉，最後包列斯達（喺比賽時都俾DC抓傷咗頸）好不幸咁跌咗落佢圈套。佢嘅行為真係好乞我憎！」佢仲話：「每個球員都應該有一條底線，偏偏哥斯達就成日越過呢條線。」至於當年出咗名係球場「惡霸」嘅阿仙奴名宿基昂就喺Twitter相當憤怒：「我真係好想同佢（DC）踢番場波。」
回顧歷史，其實DC一直以球場臭脾氣見稱，佢挑釁對手嘅行為更加多不勝數（見附表）。講到DC嘅「惡霸」絕招，當然係佢雙腳啦！上年11月，佢爭波時雙腳踢向新特蘭球員奧沙；到今年一月更加離譜，聯賽盃對利物浦時連踩對方嘅安利簡恩同史卡迪爾，仲用手插謝拉特對眼，事後更被罰停賽三場。針對佢嘅惡行，英國《太陽報》就搞咗個投票，結果大概1,400個人裏面，差唔多有八成半人都認為DC係英超最「嗱喳」嘅球員。你今次真係水洗都唔清！
阿仙奴鬥熱刺缺三將
雖然DC球場品行好唔要得，但係球證對住佢永遠都相當仁慈，而上場嘅執法球證甸恩當然唔例外。甸恩呢場吹得極差，令到兵工廠死敵、熱刺名宿曲斯都忍唔住出聲：「我認為甸恩係個好球證，但佢成日都想成為比賽焦點。佢破壞咗一場偉大嘅比賽。」法國電視台Canal+仲寸到選咗甸恩做最佳球員㖭。阿仙奴喺呢場大戰輸波之餘，仲有包列斯達同辛迪卡索拉先後領紅出場，以及高基連半場傷出，嚟緊喺周三英聯盃訪熱刺冇咗呢三件主力，領隊雲格格肯定好頭痕。