電話騙案未停過，早前就有女商人俾假順豐速遞公司呃咗千幾萬，啲騙徒仲猖獗到連劉嘉玲都想呃，不過醒目嘅嘉玲當然冇咁易上當啦！嘉玲噚日喺中環為慈善步行做嘉賓，自爆試過接到自稱「順豐速遞」職員嘅電話，佢講番成個電話騙案過程話：「對方打嚟問我係咪電話機主，又問我係咪喺上海寄咗一份嘢去嘉定，係一個唔合法、犯法嘅護照。我覺得冇可能，除非係我阿媽，我諗清楚個地址都唔啱，於是我cut佢線，跟住佢再打番畀我問做乜cut佢線，一個正規公司係唔會咁問，我話『係呀我cut你線，如果再打嚟我就報警』唔知點解有我資料。」
嘉玲媽遇假公安
嘉玲仲話連媽咪都差啲中招：「我阿媽都收到一個公安電話，話爭人5,000幾蚊電話費，阿媽一聽到公安就好驚，好彩我當時喺度，如果唔係佢就去咗交錢。」嘉玲仲分享咗個朋友經歷：「有個台灣朋友收到一個自稱舊同學嘅求救電話，因為把聲一樣，又講得出以前學校嘅事，所以個朋友就自動自覺交錢，真係好恐怖。」
噚日個慈善步行活動係想加深市民對婦科癌症嘅認識，嘉玲話每半年至9個月就會做婦科檢查：「我好驚青，會叫女性朋友去檢查，好似阿梅（梅艷芳）遲發現，問題大咗。我𠵱家都少出街應酬，飲食清淡，多做運動。」
撰文：馮仁昭