大家都知國家主席習近平鍾意足球，早着先機、搞咗足球好一段時間嘅恒大（3333）主席許家印，自然快人一步，食正條水。許家印早幾日就同另一名富豪萬達董事長王健林，跟住國務院副總理劉延東，飛去倫敦開中英足球發展會議，睇下將來有冇合作空間。
山長水遠飛去歐洲，許家印前晚就順便飛到馬德里，睇埋西甲球隊皇家馬德里，主場鬥CF格蘭納達嘅比賽。皇馬會長佩雷斯跟許家印坐貴賓席睇波，賽後當然少不了指定動作，搵班球星集郵喇，C朗、占士、馬些路全部走唔甩。
不過話時話，王健林早排入股同市嘅馬德里體育會，唔知許家印去睇皇馬比賽之餘，會唔會順便研究埋投資皇馬嘅可能性呢？到時兩支西班牙冠軍級球隊，都見到紅色資本身影，合晒習大大心水。