講開阿爺近年推動體育產業，不得不提在港上市接近兩年嘅智美體育（1661），呢隻股喺今年4、5月港股大時代期間，食盡個勢，市值一度衝上去136億元，但隨住大時代玩完，呢隻股嘅股價亦迅速打回原形，上周五市值58億元，較高峯期唔見咗接近六成。
新近呢間公司仲唔見咗幾個人㖭呀，講緊係智美忽然宣佈，財務總監（CFO）李清波因「個人原因」辭職，執行董事胡興就「希望抽出更多時間陪伴其於香港的家人」而呈辭，獨立非執董胡建國亦因為「健康原因」而辭任，三人全部係上周五（18日）一齊拜拜，難得嘅係，三人搵到不同原因同公司拜拜。
公司亦好快手，升咗33歲嘅財務主管黃丹做CFO。咁都啱嘅，睇住盤數咁重要，內部晉升，同事熟頭熟路，駕輕就熟喇。