黃耀明和何韻詩昨以大愛同盟創辦人身份，出席金鐘添馬公園舉行的「一點粉紅」活動，他們除與王宗堯等擔任開幕禮主禮嘉賓外，更與鄭欣宜、盧凱彤等參與音樂會演出。而明哥昨在台上獻唱後，不忘跟現場觀眾高呼：「要繼續爭取，繼續發聲！」
詳情今見fb
下周一（28日）是雨傘運動一周年，昨日金鐘有人拉起「我要真普選」橫額，但被警方極速拆除，問到身為文化界監察暴力行動組（文化監暴）召集人的明哥和阿詩的睇法時，明哥說：「我諗政府有關方面拎走都冇用，呢個只不過係一個象徵，精神永遠都喺度，佢哋繼續拎走，但唔會拎走雨傘運動精神，佢哋唔好呃自己啦！」文化監暴在雨傘運動一周年有何活動舉行？明哥透露：「由聽日開始搵番曾經參加雨傘運動嘅人，之後會有活動，直至下個禮拜，大家留意聽日facebook會公佈。」
阿詩的父母昨日也有到場支持，有傳明哥也帶情人到場，但明哥笑說：「平時活動佢都有嚟睇，今日喺台下somewhere某地方，呢樣嘢都唔係新聞。」法國領事昨表示兩個持法國護照的同性人士可在香港的法國領事館註冊結婚，未知明哥可會考慮？明哥笑住反問：「係咪要識番個法國人？其實最好香港有同志婚姻合法。」若香港一直不合法，會否考慮到其他地方註冊？明哥表示：「冇諗過。」阿詩雖然昨與明哥一同受訪，但全程均由明哥作答。
此外，王宗堯被傳與整容索模Christy撻着，對此他說：「仲未拍拖，大家都係朋友，食飯睇戲，大家認識之中。」記者笑問是否曖昧中時，他竟坦言：「係！曖昧中。兩個人如果夾，就自自然喺埋一齊。」
採訪：王連連
攝影：仇志德