噚日嘅日聯繼續鬥得激烈，榜首廣島三箭主場爆冷0:0戰和鳥棲砂岩，仲俾同日贏波嘅鹿島鹿角追到同分；至於川崎前鋒就憑住老將大久保嘉人大演帽子戲法下，主場以6:1狂數名古屋鯨魚。
大久保嘉人連中三元
賽前廣島三箭已經連贏四場，今場對住排13嘅鳥棲砂岩諗住實食冇黐牙，點知全場攻極都攻唔入，就算有近六成控球權都無補於事；鹿島鹿角就多謝晒你喇！佢哋作客對住甲府風林，憑住金崎夢生下半場嘅入波小勝。呢場波鹿島鹿角總共射咗19次門，把握力真係唔合格！不過任你頭兩位鬥得幾咁激烈，噚日都俾老將大久保嘉人搶晒威㗎喇！33歲嘅佢連中三元，再加埋田坂祐介、小林悠同埋艾辛奴費拉拿錦上添花，帶領前鋒大勝鯨魚，連勝兩場，睇嚟真係全面復蘇！