前排睇見《蘋果》體育版請記者，入職有個好特別嘅要求，就係創意無限！咁呢個請人廣告前後都登咗兩三個月，唔知係請人嘅要求太高，定係創意兩粒字太虛令有志者卻步呢？其實要搵創意稿手，網上大把啦。
當球迷們已經唔再滿足於爬嘅文停留喺事實報道真相嘅水平，網上就湧現咗好多唔同風格嘅足球文章，大部份嘅作者其實可能只係球迷甲乙丙，但文章可讀性極高，因為球迷們個個感情氾濫，唔係愛就係恨，動之以情、說之以理。加上今時今日球迷們放喺一隊波嘅心力，絕對比要眼觀四方嘅記者來得專注，要分析愛隊來龍去脈，球迷們先係專家！仲記得季初睇咗一篇利記fans寫嘅愛隊長文，我諗應該有洋洋5,000字，入面位置變動、陣式變化、前瞻後顧樣樣有齊！如果唔係心有所屬的話，隨時會愛上埋佢隊波。
又有個球迷嘅page叫做《足球說故事》，講到明足球不是重點，重點係背後嘅故事，啱喎，有幾可睇足球故事會有眼水？佢寫到喎，仲有個page用video做自家角度英超入球分析，製作土炮，誠意十足。
前兩日見到網上有平台硬sell支持香港隊，話如果有過百萬個like 的話，將會捐10萬畀港隊，本來捐錢係好事，但重點變咗好似係呃like喎。偏偏，足球fans（圖）畀 like係一種態度，啱channel就好手鬆，但係唔啱channel呢，就呃極都呃唔到。
KEYMAN
節目主持