澳洲籍練馬師一係唔開齋，一開齋就輪住嚟，大摩第六場憑「和諧氣氛」打開馬房季內勝門後，到第七場三班千四米由「超凡夢想」勝出，帶畀賀賢季內第一win，呢日第六口孖寶就咁成為咗澳洲幫囊中物。
女馬主蘇凱欣愛駒「超凡夢想」開鑼日千二米由雷神跑第三，呢日匆出加程至千四米，檔位內移咗，配搭則冇變，不過叫座力卻唔及霍勵賢座騎沈廐2.2倍大熱「縱橫大地」，「超凡夢想」只係3.4倍次熱門。
跑落「超凡夢想」沿途前置早着先機，直路中段曾按住帶甩幾個身位，以為會大勝，惟「縱橫大地」左穿右插之下，較遲搵到位望空後，末段締極驚人之21秒62狂追，可惜仍追唔切。結果「超凡夢想」只贏一身位，「縱橫大地」屈居亞軍，3.5倍大熱Q順利開出，三、四名「赤龍駒」同「甜城效應」都係冷門，四重彩30,074元。
雷神跑完頭七場，已經勝出「會心微笑」、「和諧氣氛」、「超凡夢想」中三元。