香港前冠軍騎師、澳洲猛將潘頓，這天傷癒季內初出只騎四駒，頭三駒「滙歡騰」、「天合」、「天心星」都跑第三。去到尾場三班千四米，潘頓騎落飛馬蘇廐「競技英雄」爆出12倍冷Win，打響個人今季頭炮，全日四戰獲一冠三季百分百上名，冠軍級騎師係有番咁上下！
「競技英雄」對上四季每季都有一Win，當中對上三季均由潘頓勝出，今仗亦以同一配搭贏馬，仲帶挈埋練馬師蘇保羅打開新馬季勝門。尾場唔單止開出澳洲騎師Win，更加開埋澳洲騎師三重彩，皆因二、三名分別由潘頓同鄉羅理雅及柏寶，分別策騎「一馬當先」及「飛星凱旋」取得，三重彩派近3.3萬元，跑第四係蔡明紹座騎114倍大冷「至尊飛星」，四重彩派到77萬幾。
「競技英雄」馬主華協會團體成員梁芷珊，在看台看到咬牙切齒，十分肉緊，看見愛駒勝出後更振臂跳起，並與丈夫羅傑承、前女騎師江碧蕙及潘頓太太Nicole一起拉頭馬。
蘇保羅說：「『競技英雄』是匹很特別的馬，牠在三班可以贏得好輕鬆，但不知道為何一升上二班，表現即停滯不前。今仗三班贏馬後下仗升上二班，究竟能否打破宿命在二班取勝，真是未知之數。」