大棋局:中美金融對決第一回合 - Mr. Tregunter

大棋局:中美金融對決第一回合 - Mr. Tregunter

9月17日聯儲局唔加息,卻釋放咗另一個重要訊號,就係由現時開始,聯儲局喺加息問題上除考慮美國本土因素,亦要關注中國嘅動向。聯儲局係美國金融決策最高機構,其所考慮之事從來唔淨止金融層面,國家戰略、外交都需要顧及。這種事本來心照不宣,聯儲局絕少表現出作決策時要考慮他國,然而近月聯儲局已先後兩次提及中國因素,尤其在利率決策會議呢類官方場合提及,更係歷史上第一次。
拎一個事件作對比可以睇出呢種轉變嘅指標意義。尼克遜時期財政部長約翰‧康納利講過一句名言:「The dollar is our currency, but your problem」(美元係我哋嘅貨幣,但你嘅問題)。意思就係我玩晒,話之你。過去30年美元萬劍歸宗都係收割之時,今次喺加息問題上慎之又慎,只因棋逢敵手,將近期國際金融事件一覽可見端倪。
美國停QE前,日本加大QE兼將日圓貶值,日圓匯率並無獨立決策權而要服膺於美國戰略。美國QE時自己係美債最大買家,停QE則要搵買家接,因此日圓貶值預期同美元升值預期要以雁行形式並進,就可以製造carry trade空間令美債有買家,同時對中國出口頂爛市,從貨幣及實體貿易上兩面夾擊中國。(詳見《2015大時代‧五》)
中國有兩個前車之鑒,就係八十年代嘅日本同蘇聯。前者將資產炒爆再推爆匯水畀人空手入白刃,後者打輸石油價格戰被淘空硬通貨。所以中國十分明白坐喺到打守勢最後通常都輸,而且共產黨由起家時已看透敢戰先敢和,就算一開始已打算談判,都要出盡力打到對方焦頭爛額先有條件講和,而唔係開場十分鐘就縮然後宣佈自己階段性勝利。
中國破局嘅方法將係資本輸出,加大人民幣輻射範圍爭取空間,再利用手上嘅外匯作為子彈同美國對撼。因為美國今次經濟復蘇同以往唔同,步履不穩,耶倫打算循序漸進慢慢加息,拖長嚟加。中國手上有兩道板斧,假如人民幣大幅貶值向全球輸出通縮,美國要唔要手忙腳亂地再減息?又或大手沽美債夾高美債息,打破美日carry trade如意算盤,亦等同幫你將息口急升冇得慢慢加。兩個招數都可以打斷美元萬劍歸宗。
現時中美兩國已進入對決階段,雙方小試牛刀。美國財政部數據顯示,中國7月減持美債304億(美元,下同),創近一年半最大降幅。8月條數未出,但8月中國外匯存底減少939.29億,當佢一半來自美債都沽咗4、500億。由IMF暫時唔將人民幣加入SDR開始,到8月11日人民幣突貶展示再唔批SDR就一鑊熟,再到美國暫緩加息睇定啲。下星期習近平訪美,將係兩家坐埋講條件嘅時候。中國點解咁急,除經濟急遽下滑壓力外,稍後美國總統大選,若共和黨上台談判將更加困難,能夠喺奧巴馬任內傾掂嘅盡傾,因為時間緊逼,接下來金融動盪唔會少。

Mr. Tregunter