巴黎聖日耳門喺11月嘅歐聯分組賽將會作客對瑞典球隊馬模，呢場波聽落好似唔多吸引？聖日耳門嘅瑞典前鋒伊巴謙莫域就唔係咁諗喇！因為伊巴嘅職業生涯就係喺馬模開始，咁難得可以返家鄉踢歐聯呢類大型賽事，伊巴開心到book定馬模廣場（圖），邀請班鄉親父老一齊嚟睇波咁話喎。班球迷到時都可能唔知支持伊巴好吖，定係支持馬模好喇。