這日在南豐大厦香港老飯店吃過午飯，出來漫步行到李寶椿先施公司，再到永安公司走一遍，然後打道回寫字樓，在域多利皇后街經過三聯書店，心念一動，行入去看看新書。在入門當眼處，擺放的當然係最新熱門書（記得肥佬黎教落，佐丹奴最賣得嘅T恤一定放在離開門口兩三呎），望一望，見到四本書，作者都係新亞校友，當然乘機打書釘，揭開讀幾頁先。第一本係張倩儀（新亞中文81，前商務印書館總編輯，現為自由撰稿人）大作「大留學潮」，長達445頁，據介紹，張校友用咗十幾年時間籌備、搜集資料，以史學筆觸，細寫清末興起嘅一股留學熱潮，但並非講述名人留學史（如容閎、胡適），而係從宏觀角度，追尋民國初年留學生的規模、尋夢、報國思潮，歐美日大學對留學生的影響等等，共三十萬字，係罕見嘅一本中國近代中國學生留學史。今時今日講留學，閒過立秋，但一百年前留學就十分艱難，語言隔膜、財政困難、文化差異、交通需時，好易令留學生知難而退，而佢地堅持不懈，學成歸來對中國文化、科技各方面產生好大影響。
第二本係中大現時幾受學生歡迎嘅政治系副教授周保松（新亞哲學95）所著《自由人的平等政治》，係一本學術性濃嘅著作，銷量應該比較少，但曾獲學術界好評，或者幾賣得啩，回想1994年周保松仲係學生，到華僑日報幫手編輯第一本「中大校友」（季刊），受中大師兄師姊陸錦榮、張結鳳、張玿于指點，已顯示其深厚潛質，今日果然開花結果了。第三本係嶺南大學文化研究系副教授羅永生（新亞社會學84）之博士論文修訂本，叫做「勾結共謀的殖民權力」，（原文係英文版Collaborative Colonial Power: The Making of the Hong Kong Chinese），此書早前在網上吸引不少評論，左丁山於是揭開讀幾頁，竟然睇到作者對新亞書院與中國學生周報（周報初期由新亞學生主理）在香港的文化角色，討論詳盡。
讀學術性著作要返屋企慢慢啃，但另有一本消閒書就容易讀噃，就係陳增濤（新亞物理72）嘅「葡萄園泥土上的水──法國紅酒尋味」，左丁山識陳增濤多年，佢自新亞畢業後就留學巴黎成為法國人，娶法國太太，居住法國四十餘年，久而久之，就從法國酒客變成酒莊莊主，紅酒專家，佢寫紅酒，自然要睇！