拍賣史上最大、重達12.03卡拉嘅古墊形鮮彩藍鑽「藍月」（圖），將會喺下月2日起一連3日喺灣仔會展中心展覽廳三蘇富比秋拍會場公開展覽，之後再移師倫敦及紐約展覽。第一站就揀香港有迹可尋，因為舊年城中富豪劉鑾雄以逾2.5億元買咗粒藍鑽送畀個女Zoe，創下藍鑽世界拍賣紀錄。呢一粒藍月估值4.29億元，梗係要拎嚟畀大劉睇貨啦！咁點解叫藍月？命名靈感嚟自一句英語成語「Once in a blue moon」，意為千載難逢、極為難得，美國寶石學院（Gemological Institute of America，GIA）鑑定藍月為鮮彩藍色（Fancy Vivid Blue），屬最高級別；鑑評為內部無瑕的剔透淨度，GIA仲話藍月鑽石嘅色澤「可能在任何鑽石中，都是前所未見的級數」。而藍月揀咗11月11日光棍節喺日內瓦蘇富比拍賣，內裏有乜玄機，八方就唔清楚；但就算估值最少4億，肯定屆時大把人舉牌叫價。