英超喺周中創咗歐聯改制以嚟嘅最差成績，不過冇延續落周四晚嘅歐霸盃。熱刺憑新加盟嘅南韓國腳孫興民梅開二度，主場以3:1反勝卡拉巴克；而利物浦作客被波爾多逼和1:1。
孫興民今場取代季初啞火嘅哈利卡尼擔任正前鋒，喺上半場就已經連入兩球。賽後領隊普捷天奴就話：「我好滿意孫興民嘅表現，佢已經迅速咁融入球隊！」另一邊廂，連輸兩場嘅利物浦暫時止血，派出佐敦羅斯達等小將，作客打和波爾多1:1，領隊羅渣士話：「我對球隊喺比賽最後階段失波好失望，不過拎到一分都唔錯。」最近好多利迷都希望羅帥落台，有德國足球專家更加爆料話，利物浦高層會喺11月正式接洽前多蒙特主帥高路普，睇怕如果利物浦下周日英超贏唔到諾域治，羅渣士執定包袱都得喇。