新民主同盟噚日同傳媒茶敍，透露考慮派出16人出戰11月區議會選舉，身為唯一女將嘅王珮芝（圖），近兩年頻頻喺綠楊落區，考慮硬撼前年傳出婚外情醜聞後，妻子跳樓身亡嘅建制派區議員林發耿。王珮芝近月仲辭埋正職，不惜食穀種瞓身落區接觸市民，佢話林近兩個月有好多小動作，包括搵義工阻止佢喺林發耿出任業委會主席嘅屋苑平台宣傳。王佩芝就一於少理，大熱天時30幾度繼續喺街設立流動服務站，又上樓幫街坊搞屋宇維修，令區內唔少婆婆都認得佢，仲買蛋糕同汽水幫佢打氣，令佢覺得咁辛苦都值得。唔知11月能否搶灘成功？