呢幾日香港好多人都討論特首梁振英地位有幾超然，估唔到連香港前宗主國、英國駐港總領事吳若蘭都嚟趁熱鬧，喺佢Twitter貼咗張超然於禮賓府嘅相，抽地位超然嘅CY水，不過有政圈好事之徒睇完，覺得吳若蘭呢下抽水唔係咁簡單，仲似有借李超人暗寸CY之嫌。
於長江中心俯瞰禮賓府
話說吳若蘭喺Twitter貼咗張佢喺香港首富李嘉誠嘅長實集團總部長江中心天台，俯瞰禮賓府嘅相，仲留言話「從長江中心俯視，或者我應該說『超然』於禮賓府（View from Cheung Kong over, or should I say transcending, Hong Kong Chief Executive residence Government House）」。正所謂畫公仔都畫埋出腸，英領事話自己呢一刻超然於禮賓府，CY咪即係矮佢一截？
不過有政圈好事之徒同八方講，吳若蘭高明之處，係佢話自己企喺長江中心超然於禮賓府，即係李超人個總部在高，CY個禮賓府都只係李超人眼底之下，咁英國人眼中CY同超人邊個高邊個低？一切盡在不言中！