世事好多嘢你都估唔到，大家邊諗到上季包尾嘅孫達志，家陣已有四惕頭馬並列榜首，更諗唔到七屆冠軍練馬師蔡約翰，目前只得一席季軍，喺24廄中排包尾，頂咗上季孫達志個位。
如果你以為蔡約翰家陣心情惡劣，咁你就錯喇。原來啱啱周四排完位，下午四時左右，蔡約翰飛甩年幼女兒，同太太Coco去中環置地廣場行街拍拖，陪老婆shopping，老公隻打吡冠軍「戰利品」心律不正常後仲未復出，但老婆買嘢就有斬獲，一大袋戰利品。佢哋仲去COVA 飲下午茶，坐咗一陣由Coco埋單。
可能夫妻感情好，心境開朗關係，一向沉默寡言的蔡神仙，今朝(18日)罕有地接受訪問，仲好大方仔細分析周六(19日)賽事其中三匹戰馬的機會。
蔡約翰講到明，最愛係第十場三班1400米的「有心人」，蔡約翰說：「『有心人』上季四戰兩冠兩亞，表現出色，保守估計值二班，今仗仍在三班上陣優勢極大。而且此駒性格良好，唞暑後持續進步，今戰排五檔理想，路程又合適，贏面好樂觀。現階段很難去預測『有心人』有多少分在手，不過我有信心牠將來即使居二班，亦會係上風馬。」
至於第九場「飛廉之子」，於1000米直路賽排欠理想的1檔，蔡約翰說：「『飛廉之子』上季一出大勝，令人覺得牠大超級，我不反對牠是有質素的馬，但我強調牠仍然很稚嫩，有很多東西需要學習。再出熱倒因當天天氣炎熱，馬兒行圈時已很唔開心，情緒低落，交不出水準。今仗1檔非理想，能否克服我亦不知道。而第八場二班1200米草地的『華恩庭』，早前試閘走勢好理想，希望能交出佳績。」