白鴿黨主席卿姐月初出席港台城市論壇，一時失言叫咗新主持「蘇B」蘇敬恆做儍仔後，已即日「補鑊」喺面書道歉。卿姐噚日特別訂咗間房，同蘇B以及一眾曾經畀佢失言鬧過嘅記者飯敍，席間頻頻向蘇B表示「唔好意思」。蘇B好大方話「無擺件事喺心」，謝志峰仲話呢集點擊率爆升至100幾萬，話卿姐同蘇B組合係收視保證！
和頭酒高規格過見馮巍
呢餐和頭酒係由卿姐自己定，對蘇B同一眾記者的招待，可以話比上次見港澳辦副主任馮巍時更高規格，因為上次卿姐同馮巍食飯，都係求其喺大堂搵幾塊板圍住咋，但今次有間房，原來卿姐鬧完蘇B做儍仔後，收過唔少蘇B女粉絲電話投訴，反映蘇B真係好有女性觀眾緣喎。
席間謝志峰同八方講，自己主持城壇12年間，未試過被卿姐叫儍仔，笑言「我平日當然卿姐前、卿姐後啦」，認為上次只係「好個別事件」。蘇B就話，其實當日自己聽唔到卿姐講錯香港係「中華民國」一部份，純綷係監製兼前主持謝志峰提點，叫佢要卿姐糾正番至知，謝志峰仲話多得一句「儍仔」，城壇平時網上的點擊率有10幾萬，但蘇B被卿姐鬧嗰集，點擊率就急升至100幾萬，八方覺得蘇B真係因禍得福。
而卿姐就同八方講，嚟緊會考慮反客為主，邀請番蘇B上佢個網台節目接受訪問，若然成事，相信大家又有大把花生食啦。
李八方
mailto:[email protected]