港視的網劇時代將於下周四（24日）落幕，有大支水喉射住的內地樂視網選同日舉行「開創娛樂新時代」。傳樂視以天價47億奪得未來三年香港英超獨家轉播權，日前邀請王宗堯穿上波衫在facebook齊齊倒數，似有贈興之嫌。為淡化紅色背景，樂視力推睇波要用港式譯名，還畫漫畫嘲諷其他香港電視台，但遭網民寸爆刻意討好港人。
事實上，王維基亦意興闌珊，沒有為最後一部由黃日華擔正劇集《開腦儆探》做任何宣傳，上周每日平均點播用戶僅餘23,000，比前一周下跌26%。前晚9時許，王維基獨自駕駛凌志房車現身大坑的錶位停車場，見他一臉愁容在車廂內不停㩒電話，未知是否為公事籌謀。其間王維基曾落車去便利店買水和紙巾，之後再返上車不停講電話，但疑有食物揳在牙縫，他即出動手指撩牙，之後再飲水，坐在車內約45分鐘後駕車離開。
《娛樂審死官》拜拜
另一邊廂，香港電視娛樂（港娛）預計明年4月1日接棒亞視開台，為免自己打自己，nowTV部份收費台亦要「摺埋」，《娛樂審死官》前晚播映最後一集，主持人梁思浩在小西灣請客，拍檔Kawaii、李麗蕊、監製Jimmy等均有出席。思浩表示不愁出路，除有線和電台仍有節目出街，與港娛新合約已傾得七七八八，他預視未來電視業會百花齊放，希望無綫「發啲力」，他說：「對TVB好失望，好似播乜嘢畀人都要睇，其實觀眾有選擇權，未來會係一個競爭世界，唔好再諗住自己永遠勝利，難保一日會失去電視一哥地位。」
採訪：徐錦池、卓寶花
攝影：黃曉程、沈健程