鍾情玩具模型的金像影帝尼古拉斯基治（Nicolas Cage），原來對80年代經典日本動畫《黃金戰士》情有獨鍾，日前他再度秘密來港旅遊，便專程到灣仔被稱為玩具街的太原街狂掃10多個大、中、細不同顏色和款式的黃金戰士超合金，認真瘋狂。
日前兩訪模型店
曾多次來港的尼古拉斯，日前現身灣仔玩具街，被網友野生捕獲。網民指當日尼古拉斯一身西裝褸襯恤衫現身，身邊還有工作人員及保鑣，一行人更甚識窿路走進著名的鴻興玩具睇模型，引來在場人士紛紛拿手機狂拍，但他表現親民任影唔嬲，並繼續氣定神閒在店內慢慢揀選心水模型玩具。
記者昨日親到鴻興玩具了解，不肯上鏡的老闆娘嫻姐指周二（15日）和前日尼古拉斯曾兩度光顧，狂掃黃金戰士超合金模型，尼古拉斯跟太太和兒子（韓籍太太Alice Kim及二人所生囝囝）同行外，隨行還有一個保鑣和一個繙譯。嫻姐說：「第一日佢買咗三、四個黃金戰士，噚日（前日）又嚟一次，買咗大、中、細唔同顏色嘅黃金戰士，有黑色、金色同銀色，呢啲黃金戰士係我哋公司出，佢差不多買齊晒所有款，買咗10幾個，佢都好nice。」
其實早在2001年本報曾捕獲尼古拉斯在中環上海灘瘋狂購物，而前年他在澳門出席華鼎獎頒獎禮，更向本地傳媒透露有意在港置業，可見他確實熱愛香港。
採訪、攝影：梁繼光、徐錦池