電影《志明與春嬌》入面，男女主角余文樂、楊千嬅從一齊煲煙認識，共通點當然兩個都係鍾意食煙啦！馬場版嘅《志明與春嬌》，演化成《皓楠與嘉琦》，共通點就係兩個都係減十磅嘅見習生，而且佢哋兩個試過走埋一齊包Q喎，睇番近期皓楠仔頻頻有馬贏，可見十磅仔嘅威力的確唔細。
今戰(19日)皓楠與嘉琦會喺其中三場賽事有馬碰頭，會唔會又走埋一齊，大家可以度吓。其中第二場「有意思」用嘉琦妹，俾佢放順咗嘅話，同場對手咁水，或者成為佢嘅開齋馬都未定！
又好似第九場1000米直路賽，嘉琦妹隻「信眼光」勝在夠準，而且唔係難發揮嘅馬，跑入三甲一啲都唔出奇。同場皓楠隻「勝利寶石」呢個路程起家，相信呢場係皓楠與嘉琦最有機會包Q嘅一場！