中聯辦主任張曉明一句「特首超然於三權」激起千重浪，連來自英國倫敦金融城嘅市長葉雅倫（Alan Yarrow，圖）都有回應。葉雅倫由今個月16號開始，率領商貿代表團去香港同大陸訪問至25號，第一站就嚟咗香港。今次葉雅倫嚟香港，主要係探討雙邊合作嘅問題，所以佢見嘅大部份都係財金界別嘅人士。不過噚日佢見記者時被問到點睇張曉明嘅講法，佢都強調法治對香港發展貿易相當重要，而要實行一國兩制，自然難免出現矛盾，至於點樣處理呢啲矛盾就係特首嘅問題，而有關特首同司法嘅關係佢就唔想多講，然後又再三強調話法治對貿易真係好重要。其實葉雅倫咁強調法治嘅重要性，已經答咗特首係咪超然於三權喇。