外號「儍強」嘅財經事務及庫務局局長陳家強，噚日出席一個工商界婦女國慶午餐會時，成為現場少數嘅男嘉賓。女主持大讚儍強發表「一帶一路」演說時，全場一粒聲都無，「證明陳局長好有魅力」；之後現場女士就向儍強攞貼士，問佢女性企業家未來投資乜嘢「一帶一路」產業最好，儍強回應時先笠高帽，話覺得女性係好好嘅商人，佢識親嘅女性企業家做邊行都好成功咁話，𠱁到現場女士笑嘻嘻。儍強之後就分享，自己最睇好係物流同分銷產業，指唔少「一帶一路」嘅國家，近年消費增長都好大，相信香港作為消費市場供應者，未來都會做得好。