禮拜三晚喺法國里爾舉行嘅歐洲男籃錦標賽八強戰，立陶宛同意大利鬥到難分難解，最終前者憑住陣中唯一喺NBA搵食嘅速龍中鋒華倫斯拿斯（Jonas Valanciunas）攞到26分同15個籃板嘅「雙雙」下，打到加時贏95:85晉級四強。
自從第三場分組賽俾比利時入咗個壓哨球而輸波後，立陶宛球迷真係場場都冇得放鬆：對愛沙尼亞到最後兩秒先逆轉勝、對捷克打到加時先贏到、對格魯吉亞又拉鋸到最後10秒先鎖定勝局。今場面對陣中有三個NBA球員、包括前三分球大賽冠軍貝利連尼（Marco Belinelli）嘅意大利，立陶宛靠住高達六成嘅三分命中率致勝，將會喺周五四強戰火併塞爾維亞；勝出一方將會同喺周四對決嘅法國及西班牙嘅勝方爭冠軍。（有線62及202台明日2:55am直播）
四強火併塞爾維亞
同日另一場八強戰，塞爾維亞憑住板凳球員艾錫（Zoran Erceg）拎到全隊最高嘅20分，以89:75淘汰捷克。值得留意係，塞爾維亞嘅板凳球員今場夾埋入咗50分，比起捷克後備兵攞到嘅14分多出兩倍幾；不過，塞爾維亞嘅正選控衞迪奧杜錫（Milos Teodosic）交出12分、14助攻嘅「雙雙」，總算冇俾班「板凳暴徒」搶晒鏡。