阿爺連番出招，仍然救市失敗，令向來樂觀嘅高盛揸弗人亦睇唔過眼，指中國嘅救市手法拙劣。
高盛行政總裁（CEO）布蘭克費恩（Lloyd Blankfein）周三出席《華爾街日報》舉辦嘅研討會，談及中國經濟問題時，罕有地批評中國嘅救市手法，直言監管機構市場經驗尚淺，處理今次股災嘅手法草率兼笨手笨腳（sloppy and ham-handed），應該係鱷王近年對阿爺最唔客氣嘅批評。
今年中國經濟雖然問題多多，但布蘭克費恩7月回應傳媒訪問時，仍唱好中國未來20年大把世界，投資機會多的是，估唔到呢位忠實粉絲都轉軚，可惜忠言逆耳，阿爺未必like。
布蘭克費恩亦提到大家關心嘅美息問題，佢認為，美國經濟未好到要加息，奉勸聯儲局主席耶倫唔好俾市場牽着鼻子走喎。