創興銀行（1111）董事總經理梁高美懿出名笑容甜美，噚日佢以馬會董事身份，出席賽馬會耆智園15周年慶典暨腦動全城閉幕禮，佢喺耆智園四周圍參觀期間，遇見一位正在踩健身單車嘅婆婆，可能婆婆都被梁高嘅笑容吸引，傾咗兩句就忍唔住出手嚟個輕撫佢的臉，兩位都笑到見牙唔見眼。
耆智園係全港首間專為腦退化症患者而設嘅綜合服務中心，馬會喺15年前撥款8,100萬元成立，舊年耆智園推出咗為期16個月嘅腦動全城公眾教育活動，鼓勵市民關注腦退化症。
梁高噚日專登着得鮮艷啲去探一班老人家，一身桃紅色套裝，望落精神省鏡，佢遇到呢位婆婆仲讚佢靚女㖭呀，梁高62歲仲被人讚靚女，唔怪得笑到蓮子蓉咁樣喇。