政圈同官場噚日都好緊張，擔心特區政府「打突先生」，人身安全有冇問題？邊個係「打突先生」？咪就係日前企喺特首梁振英身邊，聽到CY直指特首地位真係好超然後，不禁露出超自然反應嘅特首辦助理處長（傳媒）黎日正Anson囉！由於Anson嘅反應，代表咗唔少市民心聲，所以佢呢段打突短片喺網絡瘋傳，睇完個個都打突。
毛記電視都有報道呢單網絡熱話：「就憑一個率真嘅表情，措手不及嘅錯愕，呢位先生成功完美搶Fo（focus)，689大帝都變咗小配角呀。」查實開頭有網民誤以為黎日正只係企喺CY隔籬嘅實Q仔，斷估唔到佢其實係AO。
咁又唔怪得大家喎。CY出巡見記者時，通常企喺側邊嘅另有其人，其中包括新聞統籌專員IC馮煒光，外界未必認得Anson係乜水。咁啱Anson今次有呢個貼身機會，相信連佢自己都估唔到，憑住真情流露而「一炮而紅」，備受網民追捧。
舊年轉職 出鏡即做主角
查實呢個特首辦助理處長（傳媒）職位係D2位，職責包括負責協助新聞統籌專員與傳媒聯絡、為特首制訂一套整體嘅公關策略、為特區政府統籌宣傳活動等等；由於CY有IC呢位「得力助手」，呢個職位嘅重要性已經同煲呔年代不可相比。而Anson舊年先由房屋署助理署長（策略規劃）轉職至此；平時冇乜出鏡發揮機會，一現身卻就成為主角，地位比CY更超然。
而當大家對Anson嘅超自然表現發出會心微笑之際，有人則替佢擔心，皆因方丈份人好小器；以誠實身體挑戰超然論？會唔會烏紗不保㗎？
李八方
mailto:[email protected]