身在澳洲嘅政務司司長林鄭月娥，噚日展開最後一站悉尼嘅訪問行程，除咗聽取新南威爾斯州政府介紹基建計劃「明日悉尼」，亦聽咗悉尼西北鐵路線嘅介紹。呢個鐵路項目原來係澳洲目前最大型嘅公共運輸基建工程，竣工後更係澳洲首個全自動捷運系統；而港鐵公司，就係營運呢條鐵路嘅合營公司大股東，難怪林鄭都好關心。
去得外地，點少得同當地港人會面，林鄭同90幾名居於澳洲嘅港人午宴時，介紹新推行嘅人口政策措施「輸入中國籍香港永久性居民第二代計劃」，向佢哋嘅第二代招手，呼籲回港幫拖，而一班留學生則喺午宴期間同林鄭selfie一番。