雖然本港零售市道麻麻，唔少國際品牌仍然排住隊來港插旗。最新有日本大型時裝集團「SHIBUYA 109」，宣佈今年12月初喺九倉（004）旗下海港城開業，仲帶埋10個從未進軍香港嘅潮牌過嚟。
成日去東京朝聖嘅港人，可能聽過澀谷「SHIBUYA 109」大名。佢嘅經營模式跟I.T（999）相似，喺一個商場內，同時引入幾十個潮牌經營。「SHIBUYA 109」第一次外闖就揀香港，證明本港零售業仍有吸引力。
公關同華華講，香港店對象以10歲至30歲後生女為主，本港冇關稅同消費稅，定價應該同日本差唔多，估計都會受港人歡迎，亦唔擔心受到中國打貪影響。雖然本港租金高昂，但公司睇好有大量旅客訪港，嚟緊仲打算開分店㖭。