香港市場資訊透明，好比翠華盞大光燈。揭吓信置（083）最新年報，戥大公子黃永光（Daryl）心罨，佢2015年度年薪得154.3萬元，比上年度只係多……9,807蚊！你冇睇錯，加人工一萬蚊都唔夠，即係0.6%！絕對跑輸通脹，真陰功。中環才俊如果收到咁嘅offer，相信會嬲到成封信扔向老闆塊面。
相比城中其他公子，Daryl其實出名人工奀。例如新世界發展（017）第三代接班人鄭志剛，舊年年薪1,630萬元，華置（127）主席劉鳴煒就都有1,244萬元。淨係計年薪，如果成班公子出嚟飲嘢，Daryl點好意思豪氣大叫一聲「呢round我嘅」？
不過咁，呢個數只係出上市公司董事份糧，Daryl家族持股收息都未計數，信置未來都由黃家子弟繼承，出糧都係象徵式啫。