2024年奧運申辦權喺禮拜二深夜截止報名，國際奧委會禮拜三就宣佈最後五個合資格申辦嘅城市，分別係美國嘅洛杉磯（圖）、德國嘅漢堡、法國嘅巴黎、意大利嘅羅馬同埋匈牙利嘅布達佩斯，而國際奧委會將於兩年後喺秘魯宣佈結果。值得留意嘅係，洛杉磯頂替咗因為驚成本超支而退出嘅波士頓申辦，如果佢哋攞到主辦權，就會係繼1932年同1984年後，第三次舉辦奧運。