今年零售業銷售數字差勁，人所共知，如細看分類數字，最差嘅就係珠寶鐘錶類，有關民生嘅零售，好似超市、百貨、手機各方面，仍有增長。零售業界議員大聲嗌死，市民冇乜反應，係有啲理由嘅，橫掂鐘錶珠寶店周街都係，執笠二三十間咯喎，關人鬼事咩！反有利抑制舖租上升。至於撤銷「限奶令」，則與零售數字無關，左丁山從2013年3月開始有限奶令之時，已經反對，今日當然支持盡早取消限奶令。梁振英猛講政府適度有為，限奶令就係一個好壞嘅有為例子。兩年幾來，左丁山識得第一次做媽咪嘅女士，起碼有十個八個，冇一個話買奶粉有問題，個個月買奶粉買得好輕鬆，至到今日仍然投訴買唔到奶粉嘅人士，唔通另有別情？不過要講多一句，上述一眾媽咪揀奶粉，冇一人揀賣廣告最多嘅所謂暢銷奶粉牌子。初生嬰兒奶粉，隻隻一樣，醫學教授早已講得清楚，唔明白嘅媽咪要去上堂。
一啲時裝及珠寶牌子在高峯時搶舖位，願付每月租金三百萬元起，屬於炒股票高追，短炒變長揸一類，依家頂唔順租金，唔值得同情。好似AON華人行，貼近畢打街/大道中轉角有一間舖位，本來係賣錶嘅，未夠一年前已經唔續租，新頂上嘅係一間甚麼意大利名牌店，點知開舖唔係咁耐箒，最近已經停業，封板畫上和黃啲低調廣告，一啲以為香港有金執之外商，算係買個教訓。
內地遊客少咗，歐美日遊客少咗，三四星地區性酒店當然生意受影響，但位於商業中心區嘅五星酒店，仍然生意不愁。一間超級企業嘅公共事務總監前幾日見到左丁山，就呻訂地方見記者非常之難，佢地既然係大企業，見記者講業績，唔可以去環頭環尾嘅，一定要在中環、金鐘嘅五星酒店，但呢啲地方經常滿到瀉，搵兩間可以打通嘅功能私家房都冇，話知你係大企業吖。究竟點解咁渴市？原來係香港受惠於國際金融中心盛名，上市公司多，內地國企唔敢鋪張箒，賺錢民企仍有不少，一到業績宣佈期，民企往往有十幾二十名高層飛來香港參加記者會，利用一個好好嘅旅行購物藉口，太太往往隨行，除咗話要租兩三個功能房之外，仲要租多五至十間客房/應承內地民企，不用花時間理會只租功能房四五個鐘頭嘅本港公司。唔怪得話做酒店一定要講location, location and location，位居要津之酒店，往往食盡地利。