喺法國里爾舉行嘅歐洲男籃錦標賽八強，東道主法國真係氣勢如虹，憑住NBA馬刺後衞柏加（Tony Parker）貢獻18分同六次助攻，周二以84:70擊敗拉脫維亞，四強就會硬拼西班牙爭入決賽。
柏加、加素領軍交足貨
力爭衞冕嘅法國，陣容真係唔嘢小，五位正選入面有四個打緊NBA，最出色梗係前FMVP柏加啦，仲有佢嘅馬刺隊友戴奧（Boris Diaw）；不過，法國都唔係單靠「馬刺孖寶」食老本，亦有新人湧現，爵士23歲中鋒高拔（Rudy Gobert）就係新一代內線強人，呢位「長手怪」上半場接應柏加傳送整球「拆你屋」，睇到現場觀眾嘩嘩聲。法國教練高列特（Vincent Collet）賽後就話：「呢場波唔係想像中咁易打，拉軍上半場畀到我哋好多壓力。」
同日另一場八強戰，西班牙就靠射入全場最高27分嘅公牛前鋒加素（Pau Gasol）尾段射入罰球奠勝，以73:71險勝希臘，四強就會對法國。兩軍包辦歐籃近三屆冠軍，而且不乏NBA球星，呢場波肯定好精采。（有線62及202台周五2:55am直播）