香港嘅航空公司都鍾意透過電影做宣傳。港航之前贊助《衝上雲霄》後，國泰（293）就搵咗內地喜劇電影《港囧》合作。劇組早前將部份電影片段放上網，搞笑橋段好唔好笑真係見仁見智。
呢段名為「《港囧》飛機番外篇」嘅影片，長約4分鐘，圍繞兩名男主角徐崢、包貝爾，與國泰靚女空姐喺飛機上嘅對話，包括用普通話俗語爭位坐、玩手機遊戲「打飛機」等，內容感覺比較低俗，笑點較低者，應該就會覺得好笑。
《港囧》上一集《泰囧》喺2012年上畫時，票房超過12億元人仔，滲透力廣，應該係吸引國泰合作嘅其中一個原因。《港囧》將於下星期上畫，市場估計都會大收旺場。國泰話，希望透過呢套戲宣傳香港旅遊業，同建立公司喺內地嘅品牌知名度。